Jino ilo Mei 11, 2023: Ritōl ro an public health ilo Oregon emōj aer jolok elōñ wāween kōmadmōd ko ñan COVID-19 ilo an jemlok idin jorrāān eo an federal. Bōk melele ko relablok kin oktak ko rekāāltata ijin.

Teej

Wāween im ia eo kwōmaron teej

TEEJ IN COVID-19 ILO OREGON

Teej ej jibañ loloorjak bwe armij ro ewōr aer nañinmij in COVID-19 ren bōke kejbarok im jibañ eo rej aikuj. Teej ej juon kein jerbal eo aurok ñan kadiklok an ajeeded COVID-19 im emaron naj jibañ an armij bōke wūno in kōmadmōd ko ewōr.

Ewōr teej in COVID-19 ko ilo Oregon, bōtab joñan teej ko ewōr remaron jelōt jen an iet mweiuk, elabtata ilo ien elab nañinmij in COVID-19 ko. Bukōt juon jikin teej iturim ejellok wonnen, ñe ejab kūrlok 211.

Iomwin melele in kajinet ko an Opij eo ej bōk eddon kejbarok im bōbrae jen nañinmij (CDC), jabdewōt armij eo ewōr an kakōlkōl ko an COVID-19 ej aikuj teej ilo ien eo emokajtata, jekdoñ ñe emōj an wā ak jab. Jabdewōt armij eo emōj an kebaak juon armij eo ewōr an nañinmijin COVID-19 (iloan jiljino ne jen juon armij eo ewōr COVID-19 ibben jab diklok jen 15 minit) emaron kabōk teej jab diklok jen lalem raan alikin an kar kebaak nañinmij eo, jekdoñ ejab walok kakōlkōl ibbeir.

Teej ko remokaj aer kwalok jemlok ko ilo tarrin 15 minit. Elañe teej eo am enaj kwalok ewōr COVID-19 ibbam, kwōj aikuj bed wōt mweo imōm im jab bed iturin armij ro jet, ekoba armij ro ilo baamle eo am, jab diklok jen lalem raan. Ñe ewōr am kakōlkōl, kwōj aikuj kōjenolok kwe make mae ien kwōjañin piba iomwin 24 awa im emmonlok kakōlkōl ko jet ibbam. Jemlok in teej ko ebōd aer kwalok ejellok nañinmij ekkā aer walok. Juon jemlokin teej eo ej kwalok ejellok nañinmij ejab melelein ke ejellok COVID-19 ibbam. Ñe emōj am kebaak nañinmij eo im teej eo am ej kwalok ejellok am nañinmij, kwōj aikuj woñmaanlok in kōmmane kultien kejbarok ko einwōt kōnake juon kein kalbubu iturin māj, kwal beim im bed jab diklok jen jiljino ne armij ñan am kejbarok ro jet.

An juon kadedelok wā in COVID-19 im wā in kakajur ko an ej wāween eo elabtata an jejjet ñan bōbrae jen an juon armij lukkun nañinmij kin COVID-19. Aurok an aoleb:

  • Bōk wā eo. Aoleb ro 6 aer allōñ im rūttolok remaron tōbrak in bōke juon wā in COVID-19.

  • Bōke juon wā in kakajur elañe ien am bōke. Aoleb ro 6 aer allōñ im rūttolok remaron bōke juon wā in kakajur jab diklok jen ruo allōñ alikin aer bōke mōttan wā ko aer jinoin ñe ejab jab diklok jen ruo allōñ alikin wā eo juon kein bōbrae kobban im rar bōke aliktata (karre in wā eo jinointata) jen wā in kakajur.

Lale ia eo kwōmaron bōke im ñaat eo kwōmaron wā.

Ta eo kwōn kōmmane ñe teej eo am enaj kwalok ewōr COVID-19

Ñe teej eo am enaj kwalok ewōr nañinmij, bed mweo imōm im ejab iturin ro jet, ekoba armij ro kwōj jokwe ibbeir.

Ñe kwōj enjaake am nañinmij:

  • Kōjenolok kwe make iomwin lalem raan jen ien eo kwar jino enjaak kakōlkōlin nañinmij ko

  • Mokta jen am bed iturin armij ro jet, loloorjak ejellok am piba jab diklok jen 24 awa ilo am jab idaak wūno im emmonlok kakōlkōl ko ibbam.

Ñe ejellok jabdewōt kakōlkōl ibbam:

  • kōjenolok kwe iomwin lalem raan jen raan eo kwar teej.

Kakkije im kejbarok kwe make. Ba ñan jikin taktō ak taktō eo am elañe enaj nana lok kakōlkōl ko am. Ñe kwōj aikuj jibañ ilo am bukōt juon taktō, kall ae lok 211.

Alikin lalem raan, kwōmaron bar bed iturin armij ro jet ñe emmonlok am mour, bōtab kwōj aikuj wōt bōk kūltien wāween kejbarok ko ñan kabōjrak am kajeeded COVID-19 ñan ro jet.

  • Aoleb ien kwōj aikuj kōnake juon kein kalbubu iturin māj iomwin bar lalem raan jabdewōt ien am bed iturin armij ro jet. Jab kebaak kajojo armij ro elab uwōta in aer bōk nañinmij ko jen COVID-19 ilo ien in.

Kōjerbal 211 einwōt juon mennin jibañ

Kall ae lok 211 ñan kajitōk ko rekkā kin COVID-19, wāween am kabōk teej ak wā, ak jibañ kin mennin jibañ ko jet.

Lale webpeij eo an Oregon Health Authority ñan melele ko relablok.

Elañe teej eo am enaj kwalok ejellok nañinmij

Ta eo kwōn kōmmane ñe teej eo am enaj kwalok ejellok COVID-19

Jekdoon teej eo am enaj kwalok ejellok nañinmij, kōmmane aoleb wāween ko kwōmaron ñan am kejbarok. Juon teej emaron jab loe kij in nañinmij eo ñe emōkaj am teej alikin am bōk nañinmij eo. Melelein mennin ej emaron wōr COVID-19 ibbam jekdoon teej eo ej ba ejellok. Im jab meloklok ke emaron bar wōr nañinmij ko jet ibbam kwōjab kōnaan kaajeeded. Ñe kwōnañinmij, bed mweo imōm ñe kwōmaron. Kenono ibben taktō eo am elañe elab joñan uwōta ñan am bōk nañinmij kauwōtata.